Josu Bergara
musikariaren webgune ofiziala
Barakaldoko Antzokian eta Bilboko Bira Kulturgunean eskaini ditugun azken kontzertuak ‘Asunak‘ diskoari agur esateko ospakizun ezin hobeak izan dira.
Hemendik aurrera, epealdi baten kontzertuak eman gabe egongo naiz. Atsedena, lasaitasuna eta beste proiektu batzuentzako denbora behar dut. Baina benetan, eta bihotz-bihotzez: musikariak, teknikariak, elkartekideak, lagunak, familia… mila-mila esker zuen etengabeko laguntza eta babesagatik.
Zuek zarie nire kanta txikien indarra.
Josu
Sara Prieto Pajares artistak ASUNAK diskorako ilustrazio oso bereziak landu ditu. Txikitasunetik handitasunera, apurka-apurka hazten diren marrazki eta irudiak; detailez beteriko arte-lanak. Hilabete honetan Bilboko Pub K2 Bilbao tabernan erakusketa antolatu dute. Doako sarrera.
Akorde Txikiak bandaren laguntzaz Amurrio Antzokian grabatutako ikus-entzunezko pieza berri honen egileak Gaizka Peñafiel eta Asier Olazar izan dira.
Ion Martinez Esnaola “Txiki” aktorea bideokliparen protagonista nagusia izan da. Donostiako aktoreak rol edo paper ezberdinak jokatu ditu (burokrata, polizia, diputatua, epailea…) askotan ekimen kultural zein sozialak jasan behar dituzten trataerak salatuz.
Abesti honetan, tangoaren erritmoa eta doinu bereziak lirika eta umorearekin uztartu dira, kritika politikoa adierazteko.
2018ko ekainaren 21ean “Asunak” disko berria Bilboko Kafe Antzokian Akorde txikiak banda osoarekin aurkeztu genuen. Beste behin, Nerea Alberdi (biolina), Mikel Nuñez (pianoa), Irati Bilbao (ahotsa), Dani Gonzalez (kontrabaxua), Lüi Young (gitarra elektrikoa) eta Txema Arana (bateria eta perkusioak) musikarien laguntzarekin taula gainean aritzea itzelezko plazerra izan zen.
Eskerrik asko bihotzez egun horretan Antzokia bete zenuten guzti-guztioi eta zuen kolaborazioak eskaini zenizkigutenoi: Gaizka Peñafiel, Rayco Sanchez, IEko kantu poteoko taldea eta abar luzea. Zuek zarie geure kanta txikien indarra.
Dabi Piedra kazetariak ARGIA komunikabiderako kontzertuaren kronika idatzi zuen.
(Argazkiak: Gaizka Peñafiel / Asier Olazar)
ETB1eko “Ahoz aho” saioan “Asunak” diskoari buruzko elkarrizketa polita egin didate.
Zuzeneko kanta pare bat eta giro atsegina izan dugu. Mila esker Ilaski Serranori eta lantalde guztiari dena erraza egiteagatik.
Gogoratu disko osoa entzun eta deskargatzeko aukera duzuela webgune honetan bertan.
